ലഹരിവിമുക്ത കേന്ദ്രം സന്ദർശിച്ച് നിർമല മാതാ പബ്ലിക് സ്കൂൾ വിദ്യാർത്ഥികൾ
സുൽത്താൻബത്തേരി : നിർമല മാതാ പബ്ലിക് സ്‌കൂളിലെ വിദ്യാർത്ഥികൾ നടവയലിലെ റീഫോം ഡി-അഡിക്ഷൻ സെൻറർ സന്ദർശിച്ചു. ലഹരിക്ക് അടിമപ്പെട്ടവരെ ചികിത്സയിലൂടെയും കൗൺസിലിങ്ങിലൂടെയും ജീവിതത്തിലേക്ക് തിരികെ കൊണ്ടുവരുന്നതിനുള്ള പ്രവർത്തനങ്ങൾ വിദ്യാർത്ഥികൾ നേരിട്ട് മനസ്സിലാക്കി.
കേന്ദ്രത്തിലെ കൗൺസിലറായ ലിബിയ വിദ്യാർത്ഥികൾക്കായി പ്രത്യേക ബോധവത്കരണ ക്ലാസ് നടത്തി. സിന്തറ്റിക് ലഹരിവസ്തുക്കളുടെ അപകടങ്ങളെക്കുറിച്ചും അവയുടെ ഉപയോഗം എത്ര വേഗത്തിൽ ആസക്തിയിലേക്ക് നയിക്കാമെന്നതിനെക്കുറിച്ചും ക്ലാസിൽ വിശദീകരിച്ചു. പ്രത്യേകിച്ച് കൗമാരപ്രായക്കാർക്ക് ലഹരിയുടെ പുതിയ രൂപങ്ങളെക്കുറിച്ചും അവയുടെ ദൂഷ്യഫലങ്ങളെക്കുറിച്ചും വിദ്യാർത്ഥികൾക്ക് വ്യക്തമായ അവബോധം ലഭിച്ചു. ലഹരിയിൽ നിന്ന് അകന്നുനിൽക്കേണ്ടതിൻ്റെ പ്രാധാന്യവും ക്ലാസിൽ വ്യക്തമാക്കി.
സ്കൂൾ പ്രിൻസിപ്പൽ ഡോ. ഗീത തമ്പി, മാനേജർ ഫാ. ലിൻസ് ചെറിയാൻ, വൈസ് പ്രിൻസിപ്പൽ ലിയ ജോസഫ്, അധ്യാപകരായ ഷീന സതീഷ്, സുരേഷ് പി.കെ., ലിനറ്റ് ജേക്കബ്, ഹിൽഡ തോമസ് എന്നിവർ സന്ദർശനത്തിൽ പങ്കെടുത്തു. ലഹരിയുടെ അപകടങ്ങളെ തിരിച്ചറിയാനും ലഹരിവിമുക്ത സമൂഹത്തിൻ്റെ പ്രാധാന്യം മനസ്സിലാക്കാനും ഈ സന്ദർശനം വിദ്യാർത്ഥികൾക്ക് സഹായകമായി.