ട്രെയിൻ യാത്രക്കാർക്ക് കോളടിച്ചു! ടിക്കറ്റ് ബുക്കിംഗിന് ഓഫറുമായി റെയിൽവേ, ചെയ്യേണ്ടത് ഇത്ര മാത്രം
/
ദില്ലി: ഇന്ത്യയിൽ ഏറ്റവും കൂടുതൽ ആളുകൾ ആശ്രയിക്കുന്ന യാത്രാ മാർഗമാണ് ട്രെയിനുകൾ. ദിവസവും പതിനായിരക്കണക്കിന് യാത്രക്കാരാണ് ട്രെയിനിൽ സഞ്ചരിക്കുന്നത്. റെയിൽവേയുമായി ബന്ധപ്പെട്ട വിവിധ സേവനങ്ങൾക്ക് വ്യത്യസ്ത തരം ആപ്പുകളായിരുന്നു യാത്രക്കാർ ഉപയോഗിച്ചിരുന്നത്. എന്നാൽ, ഇവയെല്ലാം ഏകീകരിച്ചുകൊണ്ട് റെയിൽവൺ എന്ന പേരിൽ ഒരു ആപ്പ് റെയിൽവേ അടുത്തിടെ പുറത്തിറക്കിയിരുന്നു.
ട്രെയിനിന്റെ ലൈവ് ലൊക്കേഷൻ മുതൽ ഭക്ഷണം ഓർഡർ ചെയ്യുന്നത് വരെയുള്ള സേവനങ്ങൾ ഈ ആപ്പിൽ ലഭ്യമാണ്. യാത്രക്കാർക്കിടയിൽ വലിയ പ്രചാരമാണ് റെയിൽ വൺ ആപ്പിന് ലഭിച്ചത്. ഇപ്പോൾ ഇതാ, ആപ്പിനെ കൂടുതൽ ആളുകളിലേയ്ക്ക് എത്തിക്കുന്നതിന്റെ ഭാഗമായി ഒരു ഓഫർ അവതരിപ്പിച്ചിരിക്കുകയാണ് ഇന്ത്യൻ റെയിൽവേ. റെയിൽവൺ ആപ്പ് വഴിയുള്ള അൺറിസർവഡ് ടിക്കറ്റ് ബുക്കിംഗിന് 3 ശതമാനം ഡിസ്കൗണ്ട് ലഭിക്കും. ഡിജിറ്റൽ പേയ്മെന്റാണ് ചെയ്യേണ്ടത്. ഈ ഓഫർ പരിമിത കാലത്തേയ്ക്ക് മാത്രമാണ് ലഭ്യമായിരിക്കുന്നത്. ജനുവരി 14 മുതൽ ജൂലൈ 14 വരെയാണ് ഓഫറിന്റെ കാലാവധി. ഓഫർ സ്വന്തമാക്കാൻ ചെയ്യേണ്ട കാര്യങ്ങൾ എന്തൊക്കെയാണെന്ന് നോക്കാം.
- റെയിൽവൺ ആപ്പ് ഡൗൺലോഡ് ചെയ്യുക
ഒഫീഷ്യൽ ആപ്പ് സ്റ്റോറിൽ നിന്ന് റെയിൽവൺ ആപ്പ് ഡൗൺലോഡ് ചെയ്യുക.
- അക്കൗണ്ട് ക്രിയേറ്റ് ചെയ്യാൻ സൈൻ ഇൻ ചെയ്യുക
നിങ്ങളുടെ നിലവിലുള്ള റെയിൽവേ ക്രെഡൻഷ്യലുകൾ ഉപയോഗിച്ച് ലോഗിൻ ചെയ്യുകയോ അല്ലെങ്കിൽ നിങ്ങളുടെ മൊബൈൽ നമ്പർ ഉപയോഗിച്ച് ഒരു ക്വിക്ക് രജിസ്ട്രേഷൻ പൂർത്തിയാക്കുകയോ ചെയ്യുക. നിങ്ങളുടെ അക്കൗണ്ട് ആക്ടിവേറ്റ് ചെയ്യുന്നതിന് ഒടിപി വഴി നിങ്ങളുടെ വിശദാംശങ്ങൾ പരിശോധിക്കുക.
- വിശദാംശങ്ങൾ നൽകി പ്രൊഫൈൽ പൂർത്തിയാക്കുക
നിങ്ങളുടെ പേരും ബന്ധപ്പെടാനുള്ള മൊബൈൽ നമ്പർ പോലെയുള്ള വിവരങ്ങളും നൽകുക. ഇത് ബുക്കിംഗുകൾ കാര്യക്ഷമമാക്കാനും സുഗമമായ ടിക്കറ്റ് വിതരണം ഉറപ്പാക്കാനും സഹായിക്കുന്നു.
- നിങ്ങളുടെ യാത്രാ തരവും ടിക്കറ്റ് തരവും തിരഞ്ഞെടുക്കുക
അൺറിസർവ്ഡ് ടിക്കറ്റ് ബുക്കിംഗിനുള്ള ഓപ്ഷൻ തിരഞ്ഞെടുക്കുക. തുടർന്ന് യാത്രാ തീയതിയോടൊപ്പം പുറപ്പെടുന്ന സ്ഥലവും എത്തിച്ചേരേണ്ട സ്ഥലവും നൽകുക.
- ഡിജിറ്റൽ മോഡ് ഉപയോഗിച്ച് പേയ്മെന്റിലേക്ക് പോകുക
യുപിഐ, ഡെബിറ്റ് കാർഡ്, ക്രെഡിറ്റ് കാർഡ്, നെറ്റ് ബാങ്കിംഗ് പോലെയുള്ള ഡിജിറ്റൽ പേയ്മെൻ്റ് രീതി തിരഞ്ഞെടുക്കുക. ആപ്പ് വഴി നടത്തുന്ന ഡിജിറ്റൽ പേയ്മെന്റുകൾക്ക് മാത്രമേ ഡിസ്കൗണ്ട് ബാധകമാകൂ.
- സ്ഥിരീകരിക്കുന്നതിന് മുമ്പ് നിരക്ക് പരിശോധിക്കുക
അൺറിസർവ്ഡ് ടിക്കറ്റുകൾക്ക് 3% ഡിസ്കൗണ്ട് ഓട്ടോമാറ്റിക്കായി ബാധകമാകും. കൂടാതെ നിങ്ങൾ പേയ്മെന്റ് പൂർത്തിയാക്കുന്നതിന് മുമ്പ് കുറഞ്ഞ നിരക്ക് പ്രതിഫലിക്കുകയും ചെയ്യും.
- ബുക്കിംഗ് പൂർത്തിയാക്കിയ ശേഷം നിങ്ങളുടെ ടിക്കറ്റ് സൂക്ഷിക്കുക
പണമടച്ചു കഴിഞ്ഞാൽ ആപ്പിനുള്ളിൽ തന്നെ നിങ്ങളുടെ ടിക്കറ്റ് ജനറേറ്റ് ചെയ്യപ്പെടും. യാത്രയ്ക്കിടെ ടിക്കറ്റ് പരിശോധനകൾക്കായി നിങ്ങളുടെ ഫോണിൽ ആക്സസ് ചെയ്യാവുന്ന വിധത്തിൽ ഇത് സൂക്ഷിക്കുക.
