മിന്നും താരമാണ് ഈ നാലാം ക്ലാസുകാരി, വെറും 57 സെക്കൻഡിൽ പീരിയോഡിക് ടേബിളിലെ 118 മൂലകങ്ങളുടെ അറ്റോമിക് നമ്പർ മനഃപാഠം
തൃശൂർ: ചാവക്കാട് ബ്ലാങ്ങാട് പാറാട്ടു വീട്ടിലെ നാലാം ക്ലാസുകാരി ഹബീബയാണ് ഇപ്പോൾ നാട്ടിലെ മിന്നും താരം. വെറും 57 സെക്കൻഡിൽ പീരിയോഡിക് ടേബിളിലെ 118 മൂലകങ്ങളുടെ അറ്റോമിക് നമ്പർ കൃത്യമായി പറഞ്ഞു തീർത്താണ് ഈ കൊച്ചുമിടുക്കി കലാം ബുക്ക് ഓഫ് വേൾഡ് റെക്കോർഡ്‌സിൽ ഇടം നേടിയത്. ഈ നേട്ടത്തോടെ ഹബീബക്ക് നാട്ടിൽ അഭിനന്ദന പ്രവാഹമാണ്. ബ്ലാങ്ങാട് പാറാട്ടു വീട്ടിൽ ആരിഫ് ഹസ്‌ ദമ്പതികളുടെ മകളാണ് ഹബീബ. ഗുരുവായൂർ മമ്മിയൂർ ലിറ്റിൽ ഫ്ളവർ ഇംഗ്ലീഷ് മീഡിയം എൽ.പി. സ്കൂളിലെ നാലാം ക്ലാസ് വിദ്യാർഥിനിയാണ് ഈ മിടുക്കി. റെക്കോർഡ് നേട്ടം ഹബീബയെ സംബന്ധിച്ചിടത്തോളം ഇരട്ടത്തിളക്കമാണ്. കാരണം 2024ൽ ഇന്ത്യൻ ബുക്ക് ഓഫ് റെക്കോർഡ്‌സിലും ഈ കൊച്ചുമിടുക്കി ഇടം നേടിയിരുന്നു. പഠനത്തിലും പാഠ്യേതര വിഷയങ്ങളിലും ഒരുപോലെ മികവ് പുലർത്തുന്ന ഹബീബ ശാസ്ത്രമേളയിലും അറബിക് കലോത്സവത്തിലും തന്റെ കഴിവ് തെളിയിച്ചിട്ടുണ്ട്. കൂടാതെ ബാല പ്രതിഭപുരസ്ക‌ാരവും സ്വന്തമാക്കി. ഇനിയും പല ഉയരങ്ങളും കീഴടക്കാനുള്ള പരിശ്രമത്തിലാണ് ഈ മിടുക്കി.
