റോഡിലെ കുഴി കണ്ടെത്താനും എഐ കാമറ; ദേശീയ പാതകളില്‍ പുതിയ നിരീക്ഷണ വാഹനങ്ങള്‍ വരുന്നു.

ദേശീയ പാതകളിലെ പ്രശ്നങ്ങള്‍ കണ്ടെത്താൻ അത്യാധുനിക സംവിധാനങ്ങളുമായി നാഷണല്‍ ഹൈവേ അതോറിറ്റി ഓഫ് ഇന്ത്യ.23 സംസ്ഥാനങ്ങളിലായി 20,933 കിലോമീറ്റർ ദൈർഘ്യമുള്ള റോഡുകളുടെ വിവരങ്ങള്‍ ശേഖരിക്കാനും വിശകലനം ചെയ്യാനും പ്രത്യേക വാഹനങ്ങള്‍ ഉപയോഗിക്കും. ഈ വാഹനങ്ങള്‍ റോഡുകളുടെ നിലവിലെ അവസ്ഥ, വിള്ളലുകള്‍, കുഴികള്‍ തുടങ്ങിയ പ്രശ്നങ്ങള്‍ കൃത്യമായി രേഖപ്പെടുത്തും. ഈ വിവരങ്ങള്‍ ഉപയോഗിച്ച്‌ റോഡുകളുടെ അറ്റകുറ്റപ്പണികള്‍ മെച്ചപ്പെടുത്താനും സുരക്ഷ വർധിപ്പിക്കാനുമാണ് ദേശീയ പാത അതോറിറ്റി ലക്ഷ്യമിടുന്നത്.

ഇന്ത്യയിലെ ദേശീയപാതകളുടെ വികസനത്തിനും പരിപാലനത്തിനുമായാണ് ദേശീയപാത അതോറിറ്റി പുതിയ പദ്ധതി തയ്യാറാക്കുന്നത്. മനുഷ്യ ഇടപെടലുകളില്ലാതെ റോഡിലെ അപാകതകള്‍ സ്വയമേവ കണ്ടെത്തി റിപ്പോർട്ട് ചെയ്യുന്നതാണ് സംവിധാനം. ഈ പദ്ധതിയുടെ ഭാഗമായി, നാഷണല്‍ ഹൈവേ അതോറിറ്റി ഓഫ് ഇന്ത്യ (NHAI) നെറ്റ്‌വർക്ക് സർവേ വെഹിക്കിള്‍സ് (NSV) എന്നറിയപ്പെടുന്ന പ്രത്യേക വാഹനങ്ങള്‍ 23 സംസ്ഥാനങ്ങളില്‍ വിന്യസിക്കും. ദേശീയപാതകളിലെ റോഡ് വിവരങ്ങളും റോഡിൻ്റെ അവസ്ഥയും ശേഖരിക്കും.

ഈ നെറ്റ്‌വർക്ക് സർവേ വെഹിക്കിള്‍ പ്രത്യേക അടിസ്ഥാന സൗകര്യ വികസന ഉപകരണമാണ്. ഇത് നൂതന സെൻസറുകളും ഡാറ്റ ശേഖരണ സംവിധാനങ്ങളുമുള്ള വാഹനമാണ്. ഈ വാഹനങ്ങള്‍ ദേശീയപാതകളിലെ റോഡ് വിവരങ്ങളും അവസ്ഥയും കൃത്യമായി ശേഖരിക്കും. എൻഎസ് വി സർവേകളിലൂടെ ശേഖരിക്കുന്ന വിവരങ്ങള്‍ റോഡുകളുടെ അവസ്ഥയിലെ കുറവുകള്‍ എടുത്തു കാണിക്കും. ഇത് ദേശീയപാതകളുടെ മികച്ച പരിപാലനത്തിനായി തിരുത്തല്‍ നടപടികള്‍ സ്വീകരിക്കാൻ ദേശീയ പാത അതോറിറ്റിയെ പ്രേരിപ്പിക്കും.

നെറ്റ്‌വർക്ക് സർവേ വെഹിക്കിള്‍സ് സർവേകളിലൂടെ ശേഖരിക്കുന്ന വിവരങ്ങള്‍ എൻഎച്ച്‌എഐയുടെ ‘AI’ അധിഷ്ഠിത പോർട്ടലായ ഡാറ്റാ ലേക്കില്‍ അപ്‌ലോഡ് ചെയ്യും. അവിടെ ദേശീയപാത അതോറിറ്റിയിലെ വിദഗ്ധരുടെ ഒരു പ്രത്യേക സംഘം ഈ വിവരങ്ങള്‍ വിശകലനം ചെയ്യും. റോഡിൻ്റെ അവസ്ഥയെക്കുറിച്ചുള്ള സർവേകള്‍ 3D ലേസർ അധിഷ്ഠിത എൻ എസ് വി സംവിധാനം ഉപയോഗിച്ചാണ് നടത്തുന്നത്. ഇത് ഉയർന്ന റെസല്യൂഷനുള്ള 360-ഡിഗ്രി ക്യാമറകള്‍, ഡിജിപിഎസ് (Differential Global Positioning System), ഐഎംയു (Inertial Measurement Unit), ഡിഎംഐ (Distance Measuring Indicator) എന്നിവയുടെ സഹായത്തോടെ മനുഷ്യൻ്റെ ഇടപെടല്‍ കൂടാതെ റോഡ് തകരാറുകള്‍ സ്വയം കണ്ടെത്താനും റിപ്പോർട്ട് ചെയ്യാനും കഴിവുള്ളതാണ്.

രണ്ട്, നാല്, ആറ്, എട്ട് വരികളുള്ള എല്ലാ പദ്ധതികളിലും പ്രവൃത്തി ആരംഭിക്കുന്നതിന് മുമ്ബും അതിനുശേഷം ആറുമാസത്തെ ഇടവേളകളിലും എൻ എസ് വി വഴി വിവരങ്ങള്‍ ശേഖരിക്കും. ഈ സംരംഭം നടപ്പിലാക്കുന്നതിനായി, യോഗ്യതയുള്ള കമ്ബനികളില്‍ നിന്ന് ദേശീയപാത അതോറിറ്റി ടെൻഡർ ക്ഷണിച്ചിട്ടുണ്ട്. ശേഖരിക്കുന്ന വിവരങ്ങള്‍ റോഡ് പരിപാലനം, അസറ്റ് മാനേജ്‌മെൻ്റ്, അടിസ്ഥാന സൗകര്യ വികസന പദ്ധതികള്‍ എന്നിവയ്ക്കുള്ള തീരുമാനങ്ങള്‍ എടുക്കാൻ സഹായകമാകും