വനിതകളുടെ അവകാശങ്ങളും സുരക്ഷയും ഉറപ്പാക്കുന്നതിനായി സമൂഹം ഒരുമിച്ച് പ്രവർത്തിക്കണം – മുബീന ഗഫൂർ
തലപ്പുഴ: വനിതകളുടെ അവകാശങ്ങളും സുരക്ഷയും ഉറപ്പാക്കുന്നതിനായി സമൂഹം ഒരുമിച്ച് പ്രവർത്തിക്കണമെന്ന് വിമൻ ഇന്ത്യ മൂവ്മെന്റ് വയനാട് ജില്ലാ സെക്രട്ടറി മുബീന ഗഫൂർ പറഞ്ഞു.
അന്താരാഷ്ട്ര വനിതാ ദിനത്തോടനുബന്ധിച്ച് വിമൻ ഇന്ത്യ മൂവ്മെന്റ് തവിഞ്ഞാൽ പഞ്ചായത്ത് കമ്മിറ്റി “മൗനം വെടിയൂ, സ്ത്രീ നീതിക്കായി പോരാടൂ” എന്ന മുദ്രാവാക്യത്തിൽ സംഘടിപ്പിച്ച വനിതാ സംഗമം ഉദ്ഘാടനം ചെയ്ത് സംസാരിക്കുകയായിരുന്നു അവർ.
സമൂഹത്തിൽ സ്ത്രീകൾ നേരിടുന്ന വിവിധ തരത്തിലുള്ള അതിക്രമങ്ങൾക്കും വിവേചനങ്ങൾക്കും എതിരെ ശക്തമായ നിലപാട് സമൂഹം സ്വീകരിക്കേണ്ടത് അനിവാര്യമാണെന്ന് അവർ പറഞ്ഞു. സ്ത്രീകൾക്ക് ഭയരഹിതമായി ജീവിക്കാനും അവരുടെ അവകാശങ്ങൾ ഉറപ്പാക്കാനും സർക്കാർ ഉൾപ്പെടെയുള്ള എല്ലാ സംവിധാനങ്ങളും ഉത്തരവാദിത്വത്തോടെ പ്രവർത്തിക്കണമെന്നും അവർ ആവശ്യപ്പെട്ടു.
സ്ത്രീകൾക്കെതിരായ കുറ്റകൃത്യങ്ങളിൽ കുറ്റവാളികൾക്ക് കർശനമായ ശിക്ഷ ഉറപ്പാക്കുകയും, എല്ലാ പ്രായത്തിലുമുള്ള സ്ത്രീകൾക്ക് സ്വയം പ്രതിരോധ പരിശീലനം നൽകുന്നതിനുള്ള പദ്ധതികൾ സർക്കാർ ആവിഷ്കരിക്കണമെന്നും മുബീന ഗഫൂർ ആവശ്യപ്പെട്ടു.
പരിപാടിയിൽ പഞ്ചായത്ത് പ്രസിഡന്റ് ഹസീന അധ്യക്ഷത വഹിച്ചു. ഇബ്രാഹിം മൗലവി, എസ്ഡിപിഐ തവിഞ്ഞാൽ പഞ്ചായത്ത് സെക്രട്ടറി കബീർ എന്നിവർ ആശംസകൾ അർപ്പിച്ചു സംസാരിച്ചു. വിമൻ ഇന്ത്യ മൂവ്മെന്റ് പഞ്ചായത്ത് സെക്രട്ടറി ആതിഫ, പഞ്ചായത്ത് വൈസ് പ്രസിഡന്റ് സുഹറ, സഹദിയ, സക്കീന തുടങ്ങിയവർ നേതൃത്വം നൽകി. പരിപാടിയുടെ ഭാഗമായി ഇഫ്താർ വിരുന്നും സംഘടിപ്പിച്ചു.
