അമ്മയെ മകൻ രഹസ്യമായി കുഴിച്ചുമൂടിയ സംഭവം; മാതാവിന്റേത് സ്വാഭാവിക മരണമെന്ന് പോസ്റ്റ്മോർട്ടം റിപ്പോർട്ട്
ആലപ്പുഴ: ആലപ്പുഴ തുറവൂരിൽ മകൻ വീടിനുള്ളിൽ രഹസ്യമായി കുഴിച്ചുമൂടിയ രാധയുടെ മരണം സ്വാഭാവികമെന്ന് പ്രാഥമിക പോസ്റ്റ്മോർട്ടം റിപ്പോർട്ട്. മൃതദേഹത്തിൽ മുറിവുകളോ ആന്തരികമായ രക്തസ്രാവമോ കണ്ടെത്തിയിട്ടില്ലാത്തതിനാൽ കൊലപാതക സാധ്യത പോലീസ് തള്ളിക്കളഞ്ഞു.
വാർദ്ധക്യസഹജമായ കാരണങ്ങളാലാണ് മരണം സംഭവിച്ചതെന്ന് മെഡിക്കൽ റിപ്പോർട്ട് വ്യക്തമാക്കുന്നു. രാധ മരിച്ച നിലയിൽ കണ്ടതിനെത്തുടർന്ന് മകൻ ഗിരീഷ് ആരെയും അറിയിക്കാതെ അടുക്കളയിൽ മൃതദേഹം കുഴിച്ചുമൂടുകയായിരുന്നു.
ഇത് വലിയ സംശയങ്ങൾക്ക് ഇടയാക്കിയതിനെത്തുടർന്നാണ് പോലീസ് മൃതദേഹം പുറത്തെടുത്ത് വിദഗ്ധ പരിശോധനയ്ക്ക് വിധേയമാക്കിയത്. അമ്മയുടെ മരണത്തിൽ ഗിരീഷിന് നേരിട്ട് പങ്കില്ലെന്ന് ഉറപ്പായതോടെ നിലവിൽ കസ്റ്റഡിയിലുള്ള ഇയാളെ പോലീസ് വിട്ടയയ്ക്കാനാണ് തീരുമാനം.
