പാലക്കാട് വിദ്യാഭ്യാസ ധനസഹായത്തിനായി പട്ടികവർഗ്ഗ വിദ്യാർഥികൾ നൽകിയ അപേക്ഷകൾ കുറ്റിക്കാട്ടിൽ

പാലക്കാട് വിദ്യാഭ്യാസ ധനസഹായത്തിനായി പട്ടികവർഗ്ഗ വിദ്യാർഥികൾ നൽകിയ അപേക്ഷകൾ പുഴയരികിലെ കുറ്റിക്കാട്ടിൽ നിന്ന് കണ്ടെത്തി. കൊല്ലങ്കോട് ട്രൈബൽ ഓഫീസിൽ നൽകിയ 15 ഓളം അപേക്ഷകളാണ് യാക്കര പാലത്തിനു സമീപം തള്ളിയത്. ജോലിക്കെത്തിയ കെഎസ്ഇബി ജീവനക്കാരാണ് അപേക്ഷകൾ കണ്ടെത്തിയത്.

എസ്എസ്എൽസി, പ്ലസ് ടു പരീക്ഷ പാസായ പട്ടികവർഗ്ഗ വിഭാഗത്തിൽപ്പെട്ട കുട്ടികൾക്ക് സർക്കാർ നൽകുന്ന ധനസഹായത്തിനുള്ള അപേക്ഷകളാണ് കുറ്റിക്കാട്ടിൽ ഉപേക്ഷിച്ച നിലയിൽ കണ്ടെത്തിയത്. പറമ്പിക്കുളത്തെ കുരിയാർകുറ്റി, കടവ്, എർത്ത് ഡാം, മുതലമട ചെമ്മണാംപതി, മംഗലം ഡാം ഉന്നതികളിൽ നിന്നുള്ള 15ഓളം വിദ്യാർഥികളുടെ അപേക്ഷകളാണിത്‌. എസ്‌ടി പ്രമോട്ടർമാർ വഴിയാണ് കുട്ടികൾ അപേക്ഷ നൽകിയത്. എന്നാൽ, കൊല്ലംകോട് ട്രൈബൽ ഓഫീസിൽ എത്തിയ അപേക്ഷകൾ പിന്നീട് ജില്ലാ ഓഫീസിൽ എത്തിയില്ല.

യാക്കര പുഴ പാലം ഭാഗത്ത് ജോലിക്ക് എത്തിയ കെഎസ്ഇബി ജീവനക്കാരാണ് ഇന്നലെ അപേക്ഷകൾ ഉപേക്ഷിച്ച നിലയിൽ കണ്ടെത്തിയത്.സംഭവത്തിൽ രക്ഷിതാക്കൾ ജില്ലാ കലക്ടർക്കും പട്ടികവർഗ്ഗ ഓഫിസർക്കും പരാതി നൽകി. അന്വേഷണം തുടങ്ങിയതായി ജില്ലാ ട്രൈബൽ ഓഫീസർ അറിയിച്ചു