കേന്ദ്രലേബർ കോഡിൽ നേരത്തെ നീക്കം തുടങ്ങി കേരളം; 2021ൽ ചട്ടമുണ്ടാക്കിയതിന്റെ വിവരങ്ങൾ പുറത്ത്

തിരുവനന്തപുരം: കേന്ദ്രലേബർ കോഡ് ചട്ടമുണ്ടാക്കാൻ കേരളം നേരത്തെ നീക്കം തുടങ്ങിയതിന്റെ്റെ രേഖകൾ പുറത്ത്. 2021ൽ ചട്ടമുണ്ടാക്കിയതിൻ്റെ വിവരങ്ങളാണ് പുറത്ത് വന്നത്. തൊഴിലാളി സംഘടനകളുമായോ മുന്നണിയുമായോ ചർച്ചചെയ്യാതെയാണ് സർക്കാരിന്റെ നീക്കം നടന്നത്. ഉദ്യോഗസ്ഥ തലത്തിൽ യോഗം ചേർന്നാണ് ചട്ടമുണ്ടാക്കിയതെന്നാണ് തൊഴിൽമന്ത്രി വി.ശിവൻകുട്ടിയുടെ വിശദീകരണം.

ലേബർ കോഡുമായി ബന്ധപ്പെട്ട് കേരളം 2021ൽ തന്നെ ചട്ടമുണ്ടാക്കിയെന്ന് ശിവൻകുട്ടി സമ്മതിച്ചു. ഉദ്യോഗസ്ഥ തലത്തിൽ യോഗം ചേർന്നാണ് ചട്ടമുണ്ടാക്കിയത്. എന്നാൽ നടപ്പാക്കുന്ന കാര്യം ചർച്ചയായില്ലെന്നും മന്ത്രി പറഞ്ഞു. മുന്നണികളുമായി ചർച്ച ചെയ്യാതെയാണ് സർക്കാർ ചട്ടമുണ്ടാക്കിയതെന്നും കൂട്ടിച്ചേർത്തു.

ലേബർ കോഡ് വിഷയത്തിൽ കേരളം ഉറച്ച നിലപാട് സ്വീകരിച്ചിട്ടുണ്ട്. തൊഴിൽ വകുപ്പ് കേന്ദ്ര സംസ്ഥാന സർക്കാരുകൾക്ക് തുല്യമായ പങ്ക് ഉള്ളതാണ്. അതിൽ കേന്ദ്രം ഏകപക്ഷീയമായ നിലപാട് സ്വീകരിച്ചു. കേന്ദ്രത്തെ കേരളത്തിന്റെ നിലപാട് അറിയിച്ചിട്ടുണ്ട്. ഇന്ന് 10 മണിക്ക് ലേബർ ഉദ്യോഗസ്ഥരുടെ യോഗം ചേരും. ഇതുമായി ബന്ധപ്പെട്ട് ഒരു തീരുമാനവും എടുക്കാൻ പാടില്ലെന്ന് നിർദേശം നൽകും.

കരട് വിഞാപനം ഇറക്കിയത് സംബന്ധിച്ച് 2021 കാലഘട്ടത്തിൽ ഒരു റീജിയണൽ യോഗം ചേർന്നിരുന്നു. അത് ഉദ്യോഗസ്ഥ തലത്തിൽ ചേർന്ന യോഗം ആയിരുന്നു. അന്ന് റൂൾസ് ഉണ്ടാക്കി, എന്നാൽ നടപ്പാക്കുന്നത് ചർച്ച ആയില്ലെന്നും മന്ത്രി വ്യക്തമാക്കി.

എസ്ഐആറുമായി ബന്ധപ്പെട്ട് സ്കൂ‌ൾ കുട്ടികൾക്ക് മുകളിൽ സമ്മർദ്ദം ചെലുത്താൻ അനുവദിക്കില്ലെന്നും ശിവൻകുട്ടി പറഞ്ഞു. ആരുടെ ബുദ്ധിയിൽ ഉദിച്ചതാണ് ഈ മണ്ടൻ തീരുമാനം. ഏതെങ്കിലും കുട്ടികൾക്ക് മാനസികമായി ബുദ്ധിമുട്ട് ഉണ്ടായാൽ അതിൻ്റെ ഉത്തരവാദിത്തം തെരഞ്ഞെടുപ്പ് കമ്മീഷന് ആയിരിക്കും. ഒരു കാരണവശാലും വിദ്യാർത്ഥികളെ അനുവദിക്കില്ല. അത് ഉറപ്പാക്കാൻ പൊതുവിദ്യഭ്യാസ ഡയറക്‌ടർക്ക് നിർദേശം നൽകിയിട്ടുണ്ടെന്നും അദ്ദേഹം കൂട്ടിച്ചേർത്തു.