ബാറുകളുടെ എണ്ണത്തിൽ സെഞ്ചുറി അടിച്ച് കോട്ടയം; നാലിൽ നിന്ന് 101 ഉയർന്നത് 9 വർഷത്തെ പിണറായിയുടെ ഭരണകാലത്ത്; സംസ്ഥാന ഉള്ളത് ആയിരത്തിൽ അധികം ബാറുകൾ:
ബാറുകളുടെ എണ്ണത്തിൽ അതിവേഗം സെഞ്ചുറിയടിച്ച് കോട്ടയം ജില്ല. സംസ്ഥാനത്തൊട്ടാകെയുള്ള ബാറുകളുടെ എണ്ണം ആയിരം കടന്നു. കഴിഞ്ഞ ദിവസം പുതുപ്പള്ളിയിൽ പ്രവർത്തിക്കുന്ന ഗ്രീൻവാലി ക്ലബ്ബിനു കൂടി ബാർ ലൈസൻസ് കിട്ടിയതോടെ കോട്ടയം ജില്ലയിൽ പ്രവർത്തിക്കുന്ന ബാറുകളുടെ എണ്ണം 101 ആയി.നിലവിൽ വിദേശമദ്യം വിളമ്ബാൻ കഴിയുന്ന 82 ബാറുകളും ബിയറും വൈനും വിളമ്ബാൻ കഴിയുന്ന 14 മദ്യശാലകളും കഴിഞ്ഞ ദിവസം ബാർ ലൈസൻസ് ലഭിച്ച പുതുപ്പള്ളി ക്ലബ് ഉൾപ്പടെയുളള അഞ്ചു ക്ലബ്ബുകളുമാണ് കോട്ടയത്ത് പ്രവർത്തിക്കുന്നത്. രാമവർമ്മ യൂണിയൻ ക്ലബ്, കോട്ടയം ക്ലബ്, സിറ്റിസൺ ക്ലബ്, ചങ്ങനാശേരിക്ലബ് എന്നിവയാണ് മറ്റു ക്ലബ്ബുകൾ.
ഇതിന് പുറമേ ഇല്ലിക്കൽ, പള്ളം, നാലുകോടി, പൈക എന്നിവിടങ്ങളിൽ നിർമാണം പൂർത്തീകരിച്ച ഹോട്ടലുകൾക്കും അടുത്ത മാസം ബാർ ലൈസൻസ് ലഭിക്കും. ഇതോടെ 2025-ൽ കോട്ടയം ജില്ലയിൽ പ്രവർത്തിക്കുന്ന ബാറുകളുടെ എണ്ണം 105 ആകും.2016-ൽ ഉമ്മൻ ചാണ്ടി സർക്കാർ ബാറുകളുടെ എണ്ണം വെട്ടിക്കുറച്ചപ്പോൾ സംസ്ഥാനത്ത് ആകെ പ്രവർത്തിക്കുന്ന ബാറുകളുടെ 29 ആയിരുന്നു. അന്ന് കോട്ടയത്ത് പ്രവർത്തിച്ചിരുന്ന ബാറുകൾ വെറും 4 എണ്ണം മാത്രമായിരുന്നു.
ഇതാണ് ഒമ്ബതു വർഷം കൊണ്ട് 25 മടങ്ങായി ഉയർന്നത്.
2025 ജനുവരിയിലെ കണക്കനുസരിച്ച് സംസ്ഥാനത്ത് പ്രവർത്തിക്കുന്ന ബാറുകളുടെ എണ്ണം 854 ആയിരുന്നു. എന്നാൽ പത്തു മാസത്തിനിടെയാണ് എണ്ണം ആയിരം കടന്നത്.സംസ്ഥാനത്ത് ഏറ്റവും കൂടുതൽ ബാറുകൾ പ്രവർത്തിക്കുന്നത് എറണാകുളം ജില്ലയിലാണ്. കഴിഞ്ഞ ജനുവരിയിലെ കണക്കനുസരിച്ച് 195 ബാറുകളാണ് എറണാകുളം ജില്ലയിൽ പ്രവർത്തിച്ചിരുന്നത്. ഇപ്പോൾ ഇത് 200 കടന്നു. രണ്ടാം സ്‌ഥാനത്തുള്ളത് തൃശൂർ ജില്ലയും മൂന്നാം സ്‌ഥാനം തിരുവനന്തപുരത്തിനുമാണ്. കാസർഗോഡ് ജില്ലയാണ് ഏറ്റവും പിന്നിൽ.
ലൈസൻസ് പുതുക്കിയതിലൂടെ 2021 ഏപ്രിൽ മുതൽ 2025 മാർച്ച് വരെയുള്ള കാലയളവിൽ 1225 കോടി രൂപ സർക്കാരിന് ലഭിച്ചിട്ടുണ്ട്.ക്ലബ്ബുകൾക്കുള്ള ലൈസൻസ് ഫീസ് ഇനത്തിൽ 41 കോടി രൂപയാണ് ഈ കാലയളവിൽ സർക്കാരിന് ലഭിച്ചത്.യു.ഡി.എഫ്. സർക്കാർ പൂട്ടിയ 282 ബാറുകൾ തുറക്കാൻ അനുമതി നൽകിയാണ് ആദ്യ പിണറായി സർക്കാർ ആദ്യ മദ്യ നയം പ്രഖ്യാപിച്ചത്. ഒന്നാം പിണറായി സർക്കാരിന്റെ അവസാന കാലത്ത് സംസ്ഥാനത്ത് പ്രവർത്തിച്ചിരുന്ന ബാറുകളുടെ എണ്ണം 671 ആയി ഉയർന്നു. ഇതാണ് അഞ്ചു വർഷം ആകുമ്ബോഴേക്കും ആയിരത്തിലധികമായി ഉയർന്നത്.
