അമിതമായ ജോലിഭാരം താങ്ങാനാകുന്നില്ല’ ; തഹസിൽദാർക്ക് സങ്കട ഹർജി നൽകി കൊണ്ടോട്ടിയിലെ ബിഎൽഒമാർ
അമിതമായ ജോലി ഭാരം താങ്ങാനാവുന്നില്ലെന്ന് ചൂണ്ടിക്കാണിച്ച് തഹസിൽദാർക്ക് സങ്കട ഹർജി നൽകി കൊണ്ടോട്ടിയിലെ ബിഎൽഒമാർ. മലപ്പുറം കൊണ്ടോട്ടി താലൂക്കിലെ ബിഎൽഒമാരാണ് തഹസിൽദാർക്ക് സങ്കട ഹർജി നൽകിയത്. ആരുടെയെങ്കിലും വോട്ട് നഷ്‌ടപ്പെട്ടാൽ എല്ലാവരും തങ്ങൾക്കെതിരെ നീങ്ങുമെന്ന് ആശങ്കയുണ്ടെന്നും ബിഎൽഒമാർ ഹർജിയിൽ പറഞ്ഞു.
അശാസ്ത്രീയമായ രീതിയിലാണ് ഫോം വിതരണം നടത്തുന്നത് ജോലി സമ്മർദം കൂടുതലാണെന്നും ചുരുങ്ങിയ സമയത്തിനുള്ളിൽ എല്ലാ കാര്യങ്ങളും ബിഎൽഒമാർ ചെയ്യേണ്ട അവസ്ഥ ഉണ്ട്. തിടുക്കപ്പെട്ട് ഈ ജോലികൾ ചെയ്‌തുകഴിഞ്ഞാൽ പല വോട്ടർമാരുടെയും വിവരങ്ങൾ ചേർക്കപ്പെടാതെ പോകും പിന്നീട് ജനങ്ങളെല്ലാം തങ്ങൾക്ക് നേരെ തിരിയാനുള്ള സാഹചര്യം ഉണ്ടാകുമെന്നും ബിഎൽഒമാർ തഹസിൽദാർക്ക് നൽകിയ പരാതിയിൽ കൂട്ടിച്ചേർത്തു.
നവംബർ 4 മുതൽ ഡിസംബർ 4 വരെയുള്ള കാലയളവിൽ ആദ്യം നൽകിയിരുന്ന ജോലി ഫോം നൽകലും അത് തിരികെ വാങ്ങലും മാത്രമായിരുന്നു. എന്നാൽ ഇപ്പോൾ ഡാറ്റ എൻട്രി കൂടി ചെയ്യണമെന്നാണ് ഉദ്യോഗസ്ഥർ പറയുന്നത്.സർവർ തകരാറുകൾ ഉള്ളതിനാൽ ചുരുങ്ങിയ സമയപരിധിയ്ക്കുള്ളിൽ ഇത്തരം കാര്യങ്ങൾ ചെയ്‌തു തീർക്കാൻ സാധ്യമല്ല. സമയം നീട്ടി നൽകണമെന്നും ബിഎൽഒമാർ പറഞ്ഞു.
