വണ്ടി നമ്പർ കാമറ തിരിച്ചറിയും, ടോൾ ബൂത്തുകളിൽ കാത്തുകെട്ടിക്കിടന്ന് ഇനി സമയം കളയണ്ട; ആധുനിക ടോൾ ബൂത്തിന് രാജ്യത്ത് തുടക്കം

ന്യൂഡൽഹി: ടോൾ ബൂത്തുകളിൽ കാത്തുകെട്ടിക്കിടന്ന് ഇനി സമയം കളയണ്ട; തടസമില്ലാതെ ടോൾ പ്ലാസകൾ കടന്നുപോകാം. യാത്രകൾ സുഗമമാക്കുന്നതി​ന്റെയും ചരക്കു ഗതാഗതം വേഗത്തിലാക്കുന്നതിന്റെയും ഭാഗമായി ഗവൺമെന്റ് കൊണ്ടുവരുന്ന ആധുനിക സംവിധാനത്തിന്റെ രാജ്യത്തെ ആദ്യ പരീക്ഷണം ഗുജറാത്തിലെ ചോർയസി ടോർ പ്ലാസയിൽ തുടക്കമായി. ഇവിടെ ആരും തടഞ്ഞുനിർത്തി സമയം കളയില്ല, ഹൈവേയിലൂടെ സുഗമമായി യാ​ത്ര ചെയ്യാം.ദേശീയപാത അ​തോറിറ്റി ഇവിടത്തെ പണം പിരിക്കുന്നതിന് രാജ്യത്തെ പ്രമുഖ ബാങ്കിന് അനുവാദം നൽകി. ഇതുസംബന്ധിച്ച നിയമപ്രകാരം ബാങ്കുകൾക്കു മാത്രമേ ഇതിനുള്ള​ ടെൻഡർ നൽകാനാകൂ. മെട്രോ റെയിൽ പ്രൊജക്ടുകളിലെ ചാർജ് ഈടാക്കൽ സംവിധനംതന്നെയാണ് ഇവിടെയും നടപ്പാക്കുക.ബാരിയർലെസ് മൾട്ടിലെയ്ൻ ഫ്രീഫ്ലോ (എം.എൽ.എഫ്.എഫ്) എന്ന സംവിധാനം ആദ്യം നിലവിൽ വന്നത് 246 കിലോമീറ്റർ ദൂരമുള്ള ബറൂച്ച്-സൂറത്ത് ദേശീയപാതയിലാണ്. നമ്പർപ്ലേറ്റ് തിരിച്ചറിയൽ എ.ഐ കാമറകൾ വഴിയും ആർ.എഫ്.ഐ.ഡി സ്കാനുറകൾ ഉപയോഗിച്ചുമാണ് ഈ ടോൾപിരിവ് സുഗമമാക്കുന്നത്.പുതിയ സംവിധാനം രാജ്യത്തെ പല പ്രമുഖ ടോൾപ്ലാസകളിലും ഉടൻ നടപ്പാക്കി ഇതിന്റെ പ്രയോഗ സാധ്യത, സ്വീകാര്യത തുടങ്ങിയവ പഠിക്കും. പിന്നീടാകും രാജ്യം മൊത്തത്തിൽ നടപ്പാക്കുക. ഘരവുണ്ട, നെംലി, ദ്വാരക എക്സ്പ്രസ്​വേയിലും ഗുരു​ഗ്രാം-ജയ്പൂർ സെക്ഷനിലും ആയിരിക്കും പൈലറ്റ് പ്രൊജക്ടുകൾ നടപ്പാക്കുക. രാജ്യം മുഴുവൻ ഈ സിസ്റ്റം നടപ്പാക്കാനുള്ള തയ്യാറെടുപ്പിലാണ് റോഡ് ട്രാൻസ്പോർട്ട് ആന്റ് ഹൈവേ മന്ത്രാലയം.ഈ സംവിധാനം യാത്രാസമയവും ചരക്കുനീക്ക സമയവും കുറയ്ക്കുന്നതിനൊപ്പം ഹൈവേകളിലെ തിക്കുംതിരക്കും ഗണ്യമായി കുറയ്ക്കുകയും ചെയ്യുമെന്ന് മന്ത്രാലയം വിലയിരുത്തുന്നു.യാ​ത്രികർക്ക് സാമ്പത്തികലാഭവും ഇതുവഴിയുണ്ടാകും. യാ​ത്ര ചെയ്യുന്ന കിലോമീറ്ററി​ന്റെ പണം മാത്രം നൽകിയാൽ മതി എന്നതാണ് പ്രത്യേകത. ലോകത്തെ പ്രമുഖ രാജ്യങ്ങളിൽ നിലവിലുള്ള സ​​മ്പ്രദായമാണിത്.