കൽപറ്റ നഗരസഭയിലെ സമ്പൂർണ്ണ സൗജന്യ കുടിവെള്ള കണക്ഷൻ വിതരണത്തിനു അംഗീകാരമായി

.കൽപറ്റ: കൽപറ്റ നഗരസഭയിലെ സമ്പൂർണ്ണ സൗജന്യ കുടിവെള്ള കണക്ഷൻ വിതരണത്തിനു കൗൺസിൽ അംഗീകാരമായി.
അമൃത് 2.0 പദ്ധതിയിൽ ഉൾപ്പെടുത്തിയാണ് കൽപറ്റ നഗരസഭയിൽ മുഴുവൻ ഡിവിഷനുകളിലെ വീട്ടുകളിലും സൗജന്യ ശുദ്ധജല വിതരണ കണക്ഷൻ നൽകുന്ന പദ്ധതി.
സംസ്ഥാനത്ത് ആദ്യമായാണ് ഇത്തരത്തിൽ ഒരു തദ്ദേശസ്വയം ഭരണ സ്ഥാപനത്തിൽ സമ്പൂർണ സൗജന്യ കുടിവെള്ള കണക്ഷൻ നൽകുന്ന പദ്ധതി നടപ്പിലാക്കുന്നത്.

നിലവിൽ ശുദ്ധജല കണക്ഷൻ ലഭ്യമായിട്ടില്ലാത്ത നഗരസഭയിലെ 6000 വീടുകൾക്കും സൗജന്യമായി കുടിവെള്ള കണക്ഷൻ ലഭ്യമാക്കി കൽപറ്റ മുനിസിപ്പാലിറ്റിയെ സമ്പൂർണ്ണ ശുദ്ധജല വിതരണ സൗകര്യമുള്ള മുനിസിപ്പാലിറ്റിയാക്കി മാറ്റുന്ന ജനകീയ പദ്ധതിയാണ് വിഭാവനം ചെയ്‌തിട്ടുള്ളത്.
പദ്ധതിയുടെ ഭാഗമായി
നഗരസഭയിലെ നിലവിലുള്ള 28 ഡിവിഷനുകളിലും കാലപഴക്കം ചെന്ന പൈപ്പ് ലൈനുകൾ 65 കിലോ മീറ്റർ നീളത്തിൽ പൂർണമായും മാറ്റി സ്ഥാപിക്കും. നഗരസഭയിലെ ശുദ്ധജലവിതരണ കണക്ഷൻ ലഭ്യമല്ലാത്ത മുഴുവൻ വീടുകളിലേക്കും സൗജന്യമായി ജലവിതരണ കണക്ഷനുകൾ നൽകും.
കൽപറ്റ മുനിസിപ്പാലിറ്റിയിലെ നിലവിൽ സാങ്കേതി പ്രയാസത്താൽ ശുദ്ധജല വിതരണം കൃത്യമായി നടപ്പിലാക്കാൻ സാധിക്കാത്ത ഉയർന്ന പ്രദേശമായ മൂവട്ടികുന്നിലേക്ക് 50000 ലിറ്റർ ശേഷിയുള്ള ശുദ്ധജലസംഭരണി നിർമിച്ച് 7.5 കിലോമീറ്റർ നീളത്തിൽ വിതരണ പൈപ്പ് ലൈൻ സ്ഥാപിച്ച് ജലവിതരണം നടപ്പിലാക്കും. അതോടൊപ്പം നഗരത്തിൽ നിലവിൽ ശുദ്ധജല വിതരണത്തിൽ പ്രയാസങ്ങൾ അനുഭവിക്കുന്ന നഗരസഭ മുട്ടിൽ പഞ്ചായത്തുമായി അതിർത്തി പങ്കിടുന്ന പ്രദേശങ്ങൾ, റാട്ടക്കൊല്ലിമലയിലെ ഉൾ പ്രദേശങ്ങൾ, പൊന്നട നെടുനിലം പ്രദേശങ്ങൾ എന്നിവിടങ്ങളൊക്കെ ഈ പദ്ധതിയുടെ ഭാഗമായി മാറും.

കൂടാതെ കൽപറ്റ ജലവിതരണ പദ്ധതിയുടെ ഭാഗമായ 10 ദശലക്ഷം ലിറ്റർ കപ്പാസിറ്റിയുള്ള കാരാപ്പുഴയിലെ ജലശുദ്ധീകരണ ശാല, ഗൂഡലായ ബൂസ്റ്റർ പമ്പിങ് സ്റ്റേഷൻ, കൽപറ്റ റെസ്റ്റ് ഹൌസ്, എമിലി, ഗൂഡലായിക്കുന്ന് എന്നിവിടങ്ങളിലെ ഉന്നതതല ജലസംഭരണികളുടെ നവീകരണം എന്നിവയും പദ്ധതിയുടെ ഭാഗമായി നടപ്പിലാക്കും.

ഇതോടൊപ്പം ജല വിതരണ പദ്ധതിയുടെ ഭാഗമായ കാരാപ്പുഴയിലുള്ള റോവാട്ടർ പമ്പിങ് സ്റ്റേഷന്റെ നവീകരണവും, 270HP സ്ഥാപിതശേഷിയുള്ള വെർട്ടിക്കൽ ടർബൈൻ മോട്ടോർ പമ്പ് സെറ്റ് സ്ഥാപിക്കലും, 11KV ഇൻഡോർ സബ് സ്റ്റേഷന്റെറ നവീകരണവും കൂടി പദ്ധതിയുടെ ഭാഗമായി നടപ്പിലാവുന്നതോടെ ശുദ്ധജല വിതരണ മേഖലയിൽ നഗരസഭയ്ക്ക് സ്വപ്നതുല്യമായ നേട്ടമാണ് കൈവരുന്നതെന്ന് നഗരസഭാ ചെയർമാൻ ടി.ജെ. ഐസ്ക് പറഞ്ഞു.

മേൽ പദ്ധതികൾക്കായി സ്റ്റേറ്റ് വാട്ടർ ആക്ഷൻ പ്ലാൻ 3 (SWAP-3)-ൽ ഉൾപ്പെടുത്തി തദ്ദേശസ്വയംഭരണവകുപ്പിൽ നിന്ന് അമൃദ് 2.0 ൽ ഉൾപ്പെടുത്തി 19.11 കോടി രൂപയുടെ പദ്ധതിയുടെ ഭരണാനുമതിയും സാങ്കേതികാനുമതിയും നഗരസഭയ്ക്ക് ലഭിച്ചിട്ടുണ്ട്. ഒരു വർഷത്തിനകം തന്നെ കൽപറ്റ നഗരസഭയെ സമ്പൂർണ്ണ സൗജന്യ ശുദ്ധജലവിതരണ പദ്ധതി നടപ്പിലാക്കിയ സംസ്ഥാനത്തെ ആദ്യത്തെ നഗരസഭ എന്ന ലക്ഷ്യപ്രാപ്‌തി കൈവരിക്കുവാനുള്ള തീവ്രയജ്ഞത്തിലാണ് നഗരസഭ ഭരണസമിതി.

നഗരസഭാ ചെയർമാൻ അഡ്വ.ടി.ജെ ഐസക്കിൻ്റെ അധ്യക്ഷതയിൽ ചേർന്ന കൗൺസിൽ യോഗത്തിൽ ആണ് തീരുമാനമായത്. വൈസ് ചെയർപേഴ്സൺ സരോജിനി ഓടമ്പത്ത്, സ്റ്റാന്റി ങ് കമ്മറ്റി ചെയർമാൻമാരായ കേയംതൊടി മുജീബ്, അഡ്വ.എ.പി.മുസ്തഫ, ആയിഷ പള്ളിയാൽ, രാജാറാണി, സി.കെ.ശിവരാമൻ, വാട്ടർ അതോറിറ്റി എക്സിക്യുട്ടീവ് എൻജിനീയർ ജിതേഷ്, അസി.എക്സിക്യുട്ടീവ് എൻജിനീയർ അനുരൂപ്, ഓവർസിയർ അഖിൽ തുടങ്ങിയവർ സംസാരിച്ചു. കൗൺസിലർമാരായ ഡി.രാജൻ, എം.ബി ബാബു, കെ.അജിത, ജൈന ജോയ്, ,ഷിബു, ഷബീർ, റെജുല, നിജിത തുടങ്ങിയവർ ചർച്ചയിൽ പങ്കെടുത്തു 1