ലിറ്റിൽ കൈറ്റ്സ് ജില്ലാ ക്യാമ്പുകൾ സമാപിച്ചു

പനമരം: ഹോം ഓട്ടമേഷനിലെ ഐഒടി സാധ്യതകളും ത്രീഡി ആനിമേഷൻ നിർമ്മാണം സാധ്യതകളും പരിചയപ്പെടുത്തിയുള്ള ലിറ്റിൽ കൈറ്റ്സ് ജില്ലാ ക്യാമ്പ് സമാപിച്ചു. ജില്ലയിലെ 68 യൂണിറ്റുകളിൽ നിന്നും ഉപജില്ലാ ക്യാമ്പിൽ പങ്കെടുത്തവരിൽ നിന്നും അനിമേഷൻ പ്രോഗ്രാമിങ് വിഭാഗങ്ങളിൽ നിന്നും തിരഞ്ഞെടുത്ത 52 കുട്ടികൾ കൈറ്റ് ജില്ലാ ഓഫീസിലും പനമരം ഗവ ഹ.ർസെക്കൻഡറി സ്‌കൂളിൽ നടന്ന ക്യാമ്പിൽ പങ്കെടുത്തു.

വീടുകളിലെ സുരക്ഷാ സംവിധാനം ഐഒടി സാധ്യതകളിലൂടെ സാധ്യമാക്കാനുള്ള പ്രോട്ടോടൈപ്പുകൾ തയ്യാറാക്കലാണ് ലിറ്റിൽ കൈറ്റ്സ് ജില്ലാ ക്യാമ്പിലെ പ്രോഗ്രാമിങ് വിഭാഗം കുട്ടികൾ പൂർത്തീകരിച്ചത്. വീടുകളിലെ ഇലക്ട്രിക്- ഇലക്ട്രോണിക് ഉപകരണങ്ങളുടെ നിയന്ത്രണം, പാചകവാതക ചോർച്ച, തീപിടുത്തം എന്നിവ കണ്ടെത്തി നിയന്ത്രിക്കാനുള്ള മൊബൈൽ ആപ്പുകൾ ക്യാമ്പംഗങ്ങൾ തയ്യാറാക്കി. പൊതു വിദ്യാലയങ്ങളിൽ പ്രവർത്തിക്കുന്ന ലിറ്റിൽ കൈറ്റ്സ് യൂണിറ്റുകൾക്ക് കേരള ഇൻഫ്രാസ്ട്രക്‌ചർ ആൻഡ് ടെക്നോളജി ഫോർ എഡ്യൂക്കേഷൻ (കൈറ്റ്) നൽകിയ റോബോട്ടിക് കിറ്റുകൾ പ്രയോജനപ്പെടുത്തിയാണ് പ്രവർത്തനങ്ങൾ പൂർത്തീകരിച്ചത്.

സ്വതന്ത്ര സോഫ്റ്റ്‌വെയർ ബ്ലെൻഡർ പ്രയോജനപ്പെടുത്തിയുള്ള ത്രിഡി അനിമേഷൻ നിർമ്മാണമായിരുന്നു ജില്ലാ ക്യാമ്പിൽ അനിമേഷൻ വിഭാഗക്കാരുടെ പ്രവർത്തനം. അനിമേഷന്റെ വിവിധ ഘട്ടങ്ങളായ മോഡലിങ്, ടെക്സചറിങ്ങ് സ്കൾപ്റിങ്, റിഗ്ഗിങ്, തുടങ്ങിയ മേഖലകളിൽ പരിശീലനം നൽകിയതിന് ശേഷമാണ് കുട്ടികൾ സ്വന്തമായി അനിമേഷൻ സിനിമ തയ്യാറാക്കയത്. ക്യാമ്പിൽ മികച്ച പ്രവർത്തനം കാഴ്‌ചവെച്ച നാല് കുട്ടികളെ സംസ്ഥാന ക്യാമ്പിലേക്ക് തിരഞ്ഞെടുത്തു. ക്യാമ്പിൻ്റെ സമാപന പരിപാടിയിൽ കൈറ്റ് സിഇഒ കെ അൻവർ സാദത്ത് ഓൺലൈനായി പങ്കെടുത്തു.